Takk fyrir helgina

Takk fyrir frábæra helgi kæru félagar.

Ég vil fyrir hönd okkar nemenda þakka Hátíðarnefndinni fyrir framtakið. Eins og Gummi Pálma sagði í dag þá voru margir sem ekki höfðu trú á að því að hægt væri að ná liðinu saman og það í Reykjaskóla, en var það heldur betur afsannað um helgina og er fólk þegar farið að tala um að halda næsta mót árið 2012.

Það var gaman að mæta á föstudaginn og hitta gömlu félagana. Við fundum gömlu herbergin og áttum góða stund í íþróttahúsinu þar sem skoðuð voru myndaalbúm og skólabækur, Raggi Kalli og Eiki gripu gítarana og við sungum nokkra góða slagara og síðan voru kappleikir háðir að Reykjaskólasið. Þeir sem ekki höfðu komið í salinn í nokkra áratugi voru sammála með það að salurinn væri eitthvað minni en í denn.

Laugardagurinn heilsaði okkur bjartur og fagur og fór sólin að skína um leið og Ragnar Karl formaður hátíðarnerfndar hafði sett mótið. Ólympíuleikar JÓDÝ group voru haldnir í sól og hita (talandi um Global Warming). Þau sendu sex lið út í óvissuna í ákafri leit að Rokkskessunni. Hóparnir tóku þessu mis alvarlega og kannaði hópurinn" Retour í grunnu" til að mynda gömlu bruggstaðina við laugina og fékk laugargesti til liðs við sig í ákafri leit að vísbendingum við inntaksrörið í sundlauginni. Keppendur hlupu milli stöðva og mátti sjá fólk hringja í vini og ekki síst þar sem spurt var um gælunöfn og er það nema von þegar Gunnhildur Gests mundi ekki einu sinni eftir því sjálf að hafa verið kölluð Dudu.

Fleiri félagar bættust í hópinn og mættu um 80 í hátíðarkvöldverð og kvöldvöku. Ruth og Skúli Þórðar sáu um veislustjórn og tóku fjölmargir til máls og var látinna félaga minnst, þeirra Jódísar Kristinsdóttur og Björns Ragnarssonar. Gamlir draumar rættust og Guðlaug Bjarna var krýnd fegursta stúlka Reykjaskóla af Ragga Kalla, at last. Maturinn var mjög góður og var mikið fjör í mannskapnum þegar haldið var út í íþróttahús þar sem kvöldvakan fór fram og tókum við Ómar Már að okkur að stýra dagskránni þar úti. Ratleikshóparnir voru allir með atriði og lauk formlegri dagskrá með afmælissöng fyrir Skjöld Sigurjóns og smá boltasprelli frá JÓDÝ group.

Hápunktur kvöldsins var klárlega þegar Hippabandið steig á svið og sungu þeir öll gömlu góðu lögin og trylltu lýðinn og mátti heyra kunnuglega grúppíuskræki á réttum stöðum. Nokkrir gestasöngvarar sungu með Hippabandinu. Ruth söng nokkur lög, Daddý söng Geng hér um og Rafmangspresturinn Þorgrímur söng  poppaðan "gamla nóa" eins og hann hafði lofað mér. Sviðið var rýmt og mætti Jónas á sviðið og héldum við að nú ætti að halda ræðu, en hann kom okkur á óvart. Hann fékk Svövu, elskuna sína til 28 ára, til að koma upp á sviðið og skellti sér á skeljarnar og bað hennar "í beinni" við mikinn fögnuð okkar hinna. Bjarki sá svo um diskótekið (reyndar smá pönk líka fyrir Júlla) og var nærri kominn morgunmatur þegar síðustu tónarnir þögnuðu. Jóga bauð svo út að borða í skottið sem fjölmargir þáðu fyrir morgunlúrinn.

Óhætt er að segja að fólk hafi verið í gleðivímu í morgunmatnum (ótrúlega stuttu eftir að diskóið þagnaði) yfir vel heppnaðri helgi og fórum við heim á leið með bros á vör með Reykaskólaarmbönd og staup til minningar um Reykjaskólamótið.

Sem sérlegur heimasíðuaðstoðarmaður Aðal óska ég eftir myndum frá ykkur. Veljið nú nokkrar góðar myndir sem þið haldið að aðrir hefðu gaman af að sjá. Þið getið líka sent mér linka á myndasíður ef þið hlaðið inn myndunum ykkar inn á slíkar síður. Ég mun svo setja myndirnar inn á Reykjaskólasíðuna okkur til ánægju og yndisauka og ekki síst til að sýna þeim sem ekki komust að þessu sinni af hverju þau misstu .   Þið skulið senda myndirnar á [e-mail]

Takk enn og aftur fyrir frábæra helgi.

kv, Herdís Sigurjóns

Hér eru nokkrar góðar.... verst þótti mér þó að hafa ekki mynd af Hippabandinu spila hu hu hu, en ég treysti á ykkur hin í því efni.

 

 

 

Athugasemdir

[Hrefna Gissurardóttir , 11.8.2008 kl. 08:54]

Takk fyrir skemmtilegta helgi, náði ekki að kveðja alla  tíminn leið alltof fljótt. Hilsen Habba

[Guðrún Jónsdóttir, 11.8.2008 kl. 10:13]

Takk öll fyrir frábæra helgi, þetta var snilldin ein.  Ég er ekki að ljúga því að ég er með harðsperrur í maganum eftir allan hláturinn og ég er enn að hlæja. Verið nú dugleg að senda inn myndir, sjálf gleymdi ég að taka myndavélina með

Hlakka til að sjá ykkur aftur eftir örfá ár og sérstakt aukaknús til allra sem ég náði ekki að kveðja sérstaklega.

Mbk

Gj

[Hrafnhildur Ýr Vilbertsdóttir, 11.8.2008 kl. 12:46]

Takk fyrir frábæra skemmtun, mikið rosalega var  gaman að hitta ykkur öll og ég hlakka mikið til næsta hittings.

[Ingibjörg R Helgadóttir, 11.8.2008 kl. 12:59]

Tær snilld allt saman  takk fyrir mig

[Guðrún Jónsdóttir, 11.8.2008 kl. 15:47]

Sæl öll, eitt enn....
.... er ekki möguleiki að safna hér á síðunni þeim kveðskap sem fram fór um helgina. Bæði þeim vísum sem átti að semja sem hluta af ratleiknum því það gleymdist að flytja þær allnokkrar en ekki síður hina frábæru kvæðabálka sem sungnir voru á staðnum. 
Ef einhver vill búa til svoleiðis færslu þá sendi ég inn vísuna frá dökkbláa liðinu (til að koma í veg fyrir einhverjar væntingar skal það tekið strax fram að vísan er reyndar hvorki dökkblá né ljósblá :))

[Bergþór Grétar Böðvarsson (IP-tala skráð) 11.8.2008 kl. 16:39]

Takk fyrir frábæra helgi

[Bergþór Grétar Böðvarsson (IP-tala skráð) 11.8.2008 kl. 16:44]

Úps! hér kemur vísan sem átti að vera með áðan

Hér stöndum við og getum ekki annað.

Hér er gott að vera,

við gerðum allt sem okkur var bannað

nema að horfa á beljurnar bera.

[Hrefna Guðný (IP-tala skráð) 16.8.2008 kl. 14:43]

Takk fyrir frábæra helgi.

Sjáumst hress á næsta móti