Lestímar

 Sæl öll! 

Þá hafa okkar ástkæru fyrrverandi kennarar fengið send bréf þar sem þeir eru boðnir velkomnir að taka þátt í hátíðarhöldunum næsta sumar. Þar segir m.a:

 Það væri okkur sönn ánægja ef þú sæir þér fært að mæta á staðinn og taka þátt í gleðinni með okkur. Það skal tekið fram að engar kröfur verða gerðar til þín af okkar hálfu um að þú rifjir upp gamalt starf. Þú þarft því ekki að:

• reyna að troða vitsmunum í hátíðargesti
• hafa umsjón með lestíma
• koma í veg fyrir samskipti kynjanna á vistum
• koma fyrrverandi nemendum í háttinn á skikkanlegum tíma

…….  og svo mætti lengi telja.          

                                                   Nefndin

Nokkrir punktar.

Það er ánægjulegt hvað viðbrögð hafa verið góð við þeirri hugmynd okkar að hittast næsta sumar. Nú þegar vitum við um marga sem hafa tekið helgina frá og ætla að mæta á hátíðina og sumir vilja mæta strax á föstudeginum.

En hérna koma nokkrir punktar:

Þótt auglýst dagskrá hefjist á laugardeginum þá er öllum velkomið að mæta á föstudeginum 8. ágúst.

• Gist er í tveggja manna herbergjum en við þurfum að koma með sængurföt.
• Það er aðstaða fyrir fellihýsi og tjaldvagna.
• Við höfum aðgang að sundlaug og íþróttasal.
• Koma má með sitt eigið áfengi en eini staðurinn sem ekki má neyta þess er í matsalnum því þar er vínveitingaleyfi.
• Greiða þarf kostnað fyrirfram inn á reikning sem tilgreindur verður síðar.

Kostnaður pr. mann:

1.  Gisting með morgunverði, hátíðarkvöldverði og kvöldvöku = 8.400 kr. 
2.  Hátíðarkvöldverður og kvöldvaka =  4.900 kr.
3.  Gisting á tjaldstæði með morgunverði, hátíðarkvöldverði og kvöldvöku = 6.300 kr.
4.   Þeir sem eingöngu ætla að koma á kvöldvöku greiði 1.000 kr
5.  Ef mætt er á föstudeginum  þá bætast 3.500 kr. við ofangreint verð (morgunverður á laugardegi innifalinn)

Ef einhver vill haga sínum málum á annan hátt þá getur viðkomandi haft samband við Ragnar Karl og fengið uppgefinn kostnað. Netfangið er [e-mail]

Að lokum má geta að það er öllum velkomið að mæta með maka á svæðið ef viðkomandi maki krefst þess og suðar stöðugt í nokkra mánuði EN það er samdóma álit nefndarinnar að maka muni hundleiðast.

Samkvæmt öruggri langtímaspá frá Sigga stormi má fastlega búast við brakandi blíðu þessa helgi með sól á himni og í hjarta og alveg makalausri helgi.

 

                                                                                     Nefndin.

 

 

 

[e-mail]

Okkur langar að safna saman netföngum ykkar til að senda frekari upplýsingar ef þarf. Netfangið er [e-mail]

Frá nefndinni

Komið þið öll sæl og blessuð.

 

Þá er búið að senda nánast öllum Reykjaskólanemendum “80 til “82 bréf, alls 172 stk  en þó eru nokkrir sem búsettir eru erlendis. Nöfn þeirra verða birt áður en langt um líður þannig ef einhver skyldi vera í sambandi við viðkomandi getur hann látið vita.

Eins munu kennarar fá bréf  en þeir eru auðvitað velkomnir.

 

Það hefur margt breyst á Reykjaskóla síðan við vorum þar í gamla daga.

Í dag eru tvenn hjón sem að reka staðinn, þau Þorvarður Guðmundson og Ingunn Pedersen ásamt Karli Örvarssyni og Halldóru Árnadóttir. Á veturnar eru starfræktar skólabúðir en á sumrin eru haldin ættarmót og mannfagnaðir af öllum stærðum og gerðum.   http://www.skolabudir.is/

 

En aðeins af helginni sjálfri. Formlega mun hátíðin byrja kl:12:00 á hádegi á laugardeginum en þeir sem vilja geta mætt á föstudeginum. Við munum fá afnot af sundlaug, íþróttasal, matsal og auðvitað svefnaðstöðu og allt verður þetta á hóflegu verði en verðlisti verður birtur síðar.

Þegar nær dregur verður nauðsynlegt að tilkynna þátttöku bæði í gistingu og mat.

En nóg í bili, takið helgina endilega frá og mætið hress og kát.

Þá er komið að því sem allir hafa talað um síðastliðin 28 ár!

Kæru bekkjar- og skólasystkin!

Þá er komið að því sem allir hafa talað um síðastliðin 28 ár.

Á sumri komandi, nánar tiltekið dagana 9-10. ágúst verður haldin hátíð til heiðurs okkur fyrrum nemenda í Reykjaskóla veturna 1980-1982.

Hátíðin verður haldin að Reykjum í Hrútafirði og hefst formlega kl. 12:00 á hádegi laugardagsins 9. ágúst á erindi Ragnars Karls Ingasonar formanns hátíðarnefndar.

Skipuleg dagskrá verður á laugardeginum, sameiginlegur kvöldverður og kvöldvaka.

Nánari upplýsingar um dagskrá, gistingu og annað má nálgast á eftirfarandi slóð:

Með kærri kveðju frá Hátíðarnefndinni

Bjarki Franzson

Dagbjört Hrönn Leifsdóttir

Eiríkur Einarsson

Ragnar Karl Ingason

Sigríður Snæbjörnsdóttir