Dagskrá Reykjaskólamóts

Föstudagur:

Fjölskyldan verður sett í að pakka töskunni með dansgallanum, íþróttaskónum, sunddótinu, grímubúninginum, regnslánni (munið það rignir aldrei né blæs í Hrútó) í bílinn og um leið og vinnu þinni er lokið, hleypur þú heim, beint í bílinn, kyssir fjölskylduna bless og brunar norður (fer eftir því hvaðan þú kemur) í Hrútafjörð, þegar komið er á svæðið kíkir þú eftir Daddý og Siggu færð hjá þeim mótsarmband hátíðarinnar.   Ekkert armband - engin hátíð. (Armband=greiðsla áður en mætt er), svo kemur þér fyrir í gamla herberginu (lendir fyrst í smá slag við þann sem var á seinna eða fyrra árinu í þessu sama herbergi), tekur upp frísbíið og fótanuddtækið, eða sjóskíðin og sixpakkið og byrjar helgina með stæl.

Hver veit nema að Kristín Ólöf heimasæta taki vel á móti okkur með frisbíið í hægri og öl í hinni, það er pottþétt að  Pétur Jónsson fyrrverandi staðarhaldari og Hrútafjarðarprins verður þarna líka í móttöku herlegheitunum, með öl í báðum og míkrófón og munnhörpu á milli tánna... eða þannig.

Kvöldið er frjálst og engin mörk sett. Nema að bannað er að ganga á grasinu og ekkert andaglas takk fyrir og allir í ró á réttum tíma!

Formleg dagskrá hefst á laugardeginum kl 13:00 í Höllinni en eins og þið sjáið þá vill varla nokkur maður missa af föstudagskvöldinu. Maður lifandi !

Laugardagur:

10:00-    Ræs, dæs Kornflex

10:00 -10:30   - Sæbergshringurinn heillar fyrir þá sem hressir eru og vilja byrja daginn snemma með skokki eða göngu.  Gunnhildur sveitakona Gestsdóttir leiðir mannskapinn um sveitastíga og svínabúið.   Lyktin er svo skoluð af áður en farið er í sund og gufu í Höllinni.  Þar munu Valgeir og Esther kenna dýfingar  og sundleikfimi .  Hittumst á smóknum áður en  lagt er af stað

13:00  Setningarræða í Höllinni - Ragnar Karl Ingason formaður hátíðarnefndar.

13:15  Jóhann nokkur Arnarson og Daddý World Class skvísa leiða okkur um króka og kima hins margslungna og dularfulla Reykjaskóla og nágrennis. Jóhann er  framkvæmdastjóri afþreyingafélagsins Jói og Daddý Grúpp  (þið vitið -svona Simmi og Jói þema) jafnframt því að vera sögumaður góður og þekkir hann draugana í Reykjaskóla jafnvel betur en börnin sín og ætti því ásamt samstarfskonu sinni að fara létt með að kynna okkur fyrir svæðinu.  Skyldumæting - viðburður sem ekki má missa af, engir lakkskór hér! 

Eftir stutta en árangursríka leit af Ragga Kalla sem væntanlega villist af leið verður haldið í Höllina góðu og línurnar lagðar fyrir kvöldið. Nú ef við höfum einhvern tíma upp á að hlaupa þá getur hver og einn spókað sig um svæðinu, farið vatnsslag, skriðið inn og út um glugga, skellt sér i sund, skoðað smókinn, látið fara vel um sig á strákavistinni og eða stelpuvistinni, já líklega best að hvíla sig vel, setja upp andlitið og bindið og telja niður í hátíðarkvöldverðinn sem hefst kl: 19:00. Úps ekki gleyma lestímanum milli 17:00-18:00. Guðlaug Bjarna passar uppá að allir séu í ró.

Eftir hátíðarkvöldverðinn og uppvaskið verður svo kvöldvaka í Höllinni sem á engan sinn líka og er ekki skortur á skemmtiatriðum á þeim bænum. Gítarleikarar eru nokkrir og söngvarar enn fleiri. Prógrammið á stóra sviðinu er sem hér segir:

Stóra sviðið

18:00-19:45  Ásgeir Jónsson jazz og dinnertónlist. Axel Rúnar og Anna Kristjáns hlaupa í skarðið            þegar Ásgeir þarf  á pissiríið

19:50-20:00 Guðni Ásgeirsson með trommusóló

20:00-20:40 Skjöldur á sokkaleistunum syngur lög úr söngleiknum Grease

20:45-21:30 Ómar Már Jónssonfyrst og fremst Vestfirðingur og sveitarstjóri syngur og leikur á gítar öll lögin á ágætri plötu Smashing Pumpkins " Mellon Collie and the Infinite Sadness".

21:35-22:15 Lýður Jónssontekur nokkra létta CCR-slagara

22:40-23:20 Geir Sveinsson tryllir lýðinn með "Megasarhitturum."

23:25-24:10 Skúli Sigurðsson tekur Sálina og Utangarðsmenn til skiptis.

24:15-24:20 Þorgrímur Daníelsson"performar" nett töfrabragð og lætur sig hverfa (útivistarleyfið þið skiljið) J

24:25:-24:50 Anna Linda Sigurgeirsdóttir syngur á magnþrunginn hátt nokkur þekkt lög úr Carmina Burana.

24:55-01:00 Sigurður Rafn A Levy flytur ljóð eftir Bob Dylan.

01:05-01:15 Gunnar Ragnarsson flytur 2 lög. Fyrst "Ljúfa líf" sem Flosi Ólafs gerði vinsælt og svo "Líf" sem að Stefán nokkur Hilmarsson gerði fyrst frægt.

01:15-01:33 Nú tekur við 18 mínútna langt bassasóló frá Gunnhildi Halldóru (Gunnu Dóru).

01:35-01:50 Helgi Pálsson plokkar nokkur vel valin gítarsóló frá hljómsveitarárum hans með "Eldist aldrei".

01:55-02:00 Hrefna Guðnýflytur lagið "Hey Jude" sem hún tryllti lýðinn með í söngkeppni Stykkishólms á dögunum.

02:00-02:10 Ruth Gylfadóttir syngur frumsamið lag eftir hana sjálfa. Lagið ber vinnuheitið: "Af hverju fást ekki svið í sjoppum úti á landi".

02:10-03:00 Gummi Pálma leikur á gítar og syngur Bubbalög.  Jón Þór kollegi hans dansar sem óður maður í takt við tóninn.

03:00-?           Open mike.

Á litla sviðinu verða einungis þrjú atriði:

21:00-21:15 Norsarinn Jórunn Anna sterka (Lóló) glímir við okkar sterkasta mann Rúnar Ívarsson og ætti það að verða æsileg barátta.

21:15-21:30 Jónas M. Pétursson dansar djæf með danshópnum sínum.  Hann verður í skyrtu og með bindi.

22:00-02:00 Þorleifur Karl"sommelier" er með vínkynningu sem teygir sig eitthvað inn í nóttina.

Sunnudagurinn  tekur svo á móti okkur sólríkur og fagur.

08:30-09:30  -  Ræs, dæs Kornflex. Fólk getur slappað af eða þá tekið þátt í "Ziggy Weathers´s open golf tournament" en það er opið golfmót sem að góðar líkur eru á að Jónína Hafdís og golfarinn Guðrún Gunnsteinsdóttir koma til með að halda fljótlega eftir að síðasti maður fer að sofa aðfaranótt sunnudagsins. Mikil og góð skemmtun þar á ferðinni. Já við minnum á frítt golfspil fyrir okkur RSK ara á Húnavöllum á glæsilegum golfvelli þeirra vallara.

Rúta verður frá vegamótum árla sunnudagsmorguns fyrir þá sem vilja eingöngu vera yfir daginn, en lágmarksfjöldi í rútu er 20 manns.

Sjáumst hress og kát kæru félagar, Hátíðarnefndin

Athugasemdir

[Guðrún Jónsdóttir, 5.8.2008 kl. 12:09]

Þetta lítur afskaplega vel út allt saman. Þjóðhátíðin búin og þá getur maður farið að huga að næsta fjöri.

Er samt orðin dálítið langeygð eftir því að fá upplýsingar um hvernig á að borga herlegheitin?  Gleymdist nokkuð að rukka mig? 

[Nemendur Reykjaskóla 1980-1982, 5.8.2008 kl. 12:27]

Við vorum að senda ítrekuarpóst á þá sem eiga eftir að greiða.

[Hrefna Gissurardóttir , 5.8.2008 kl. 12:43]

Vá ekkert smá flott dagskrá maður verður að hafa sig allan við til að missa ekki af neinu. Var svo að spekúlera hvort að hafði misst af söngvakeppninni í Stykkishólmi þar sem Hrefna Guðný söng Hey Jude? hvað ár var þetta? Allavega söng ég lag með Trúbrot  og hin Hrefnan söng ekki Bítlana.

[Herdís Sigurjónsdóttir, 5.8.2008 kl. 16:38]

Ég keyrði framhjá Reykjaskóla áðan í sól og blíðu og sá að allt var á sínum stað og reddí fyrir helgina  .... Ég rakst líka á heimasætuna Ólöfu sem var að fara í verslunarferð í borgina til að kaupa frisbí og bjór.

[Ingibjörg R Helgadóttir, 8.8.2008 kl. 01:57]

Flott dagskrá en hvergi minnst á Hippabandið hmm......

[Herdís Sigurjónsdóttir, 8.8.2008 kl. 12:41]

Imba mín, ekki hafa áhyggjur Hippabandið er náttúrulega yfir og allt um hring ....